Çfarë shoqëria shqiptare duhet patjetër të dij për legalizimet! Liberale, 14. 02. 2022
I isha betuar vetes të mos shkruaja më për legalizimet. Pas një dekade që e trajtoj këtë fenomen, isha i bindur që nuk kisha çfarë të thosha më, për proçesin politik e qeverisës ‘me moralin e piramidave ekonomike’. Sepse kështu është trajtuar përballja qeverisëse me këtë fenomen urban që ka shoqëruar, dhe vazhdon ta bëjë edhe sot, të gjithë tranzicionin shqiptar.
Skema Ponzi (Ponzi Scheme), apo sikurse
njihet në Shqipëri me emrin ‘piramidat’, ka në thelb një pamoralitet të madh.
Njerëzit që dorëzojnë paratë të parët- në skemën ekonomike pa asnjë logjikë
ekonomike- shërbehen me ‘këste’ dhe ‘përqindje’ të larta mujore që vijnë nga
njerëzit që dorëzojnë paratë të fundit. Ky është mekanizmi, për aq sa zgjat, i
‘piramidave’! Kur ky mekanizëm nuk funksionon më - sepse gjithmon ai falimenton
një ditë kur paratë, e njerëzve që dorëzojnë të fundit, nuk mjaftojnë për
njerëzit që kanë dorëzuar të parët- skema bie dhe të gjithë vrasin mendjen si
ka ndodhur gjithë kjo hata “e çuditshme”!
Përgjatë këtij proçesi e vetmja gjë që mund
të bëjnë drejtuesit e kësaj skeme është rritja progresive e ‘përqindjes’ së
fitimit potencial për klientët e vjetër por edhe të rinj. Këta të parët, kur
shohin se përfitimet e tyre mund të jenë më të larta se ato që kanë arritur
deri në atë kohë, i ridorëzojnë paratë e tyre së bashku me shtesat që kanë
arritur. Por edhe të dytët, kur shohin se të parët kanë bërë “prokopi”
nëpërmjet këtyre skemave, i dorëzojnë paratë e tyre me shpresën se do jenë aq
me “fat” sa të parët.
Mirëpo, ky kurth mund të shtyjë përkohësisht
falimentin, por asnjëherë nuk mund ta shmangi atë. Në të kundërt, sa më shumë e
largon valën goditëse të falimentit, aq më shumë e lartëson dhe e përforcon
këtë valë.
Mbi këtë moral kanë vepruar qeveritë
shqiptare nga viti 1998, kur u shkrua ligji i parë për legalizimet, deri më
sot, kur janë shkruar disa prej tyre, përfshirë dhjetëra ndryshime të bëra
secilit ligj. Me pak fjalë, sa herë janë afruar zgjedhjet- që për qeveritë do
të thotë rrezik ‘falimentimi’, apo dorëzim pushteti te partia tjetër- aq herë
janë rritur “përfitimet” për “klientët” e përfshirë në këtë proçes. Për të mos
u zgjatur shumë, mjafton të kujtojmë se në vitin 2013, premtimi i opozitës që u
bë shumicë, ishte: legalizime falas për ndërtuesit informal; dhe kompensim me
vlerë tregu për pronarët legjitim të tokës së zënë nga ndërtimet informale.
Rezultati i kësaj Skeme Ponzi të ngritur dhe
drejtuar nga qeveritë e tranzicionit është se nëse në vitin 1998 në Shqipëri
kishim vetëm 10-20 mijë ndërtesa informale të lokalizuara vetëm në periferinë
veriore të Tiranës, sot kemi mbi 500 mijë të tilla të shpërndara nëpër gjithë
qytetet e rëndësishme shqiptare, përfshirë edhe qendrat e tyre.
Dhe këtu vijmë në një pikë, kur pamorali i
legalizimeve e tejkalon pamoralin e skemave piramidale. Së pari, skemat Ponzi i
trajtojnë të gjithë klientët njësoj, kurse skema piramidale e legalizimeve jo.
Nëse dikush ka paguar nën dorë te zyrtarët e qeverisë, me para’ apo me vota, atherë
ai është më i preferuar dhe ka gjasa ta ketë mbyllur proçesin, ndërkohë që
fqinjët e tij mbeten akoma në pritje.
Një pikë tjetër ku pamoraliteti qeverisës me
legalizimet e tejkalon pamoralitetin e skemave Ponzi, është fakti se ka
bashkuar proçesin e legalizimeve me një proçes tjetër pa lidhje me të. I ardhur
nga mendësitë socialiste në qeverisje, proçesi i dytë ka lidhje me shtetëzimin
e tokës ku janë ngritur ndërtesai informale nga pronari legjitim, dhe
privatizimi i saj në përfitim të familjeve që kanë ndërtuar paleje. Pa asnjë
arsye logjike, morale apo teknike, qeverisjet etatiste shqiptare të
tranzicionit, i kanë dhënë të drejtën vetes të monopolizojnë një transaksion pronësor
midis një privati dhe një privati tjetër.
Por ka edhe një pikë tjetër, ku pamoraliteti
qeverisës me legalizimet tejkalon në mënyrë stratosferike pamoralitetin e skemës
Fonzi. Ajo ka të bëj me faturën që duhet të përballoj publiku nga ky proçes i
dyfishtë, dhe këtu nuk e kam fjalën vetëm për faturën e mbajtjes së një
institucioni shtetëror kaq të stërmadh, sikurse është ALUIZNI. Jo e kam fjalën
për super faturën që origjinalizon nga karakteristika etatiste, socialiste e
shtetit që hyn kudo dhe shtrihet gjithkund, në çështjet që fare mirë mund ti
rregulloj tregu. Diferenca midis faturës që paguan ndërtuesi informal për
privatizimin e tokës së zënë nga ndërtimi i tij, me faturën e shtetëzimit të
kësaj toke, duhet ta paguajnë taksapaguesit e tjerë që as nuk kanë ndërtuar
informalisht dhe as nuk kanë toka të zëna nga këto ndërtime informale, dhe kjo
është për rreth 25-30% të ndërtimeve informale, dhe mund të shkoj në disa
miliard euro.
Dhe këtu vijmë te arsyeja, pse unë ju ktheva
çështjes së legalizimeve, dhe ajo është se sikurse Skema Ponci, edhe
‘piramidës’ së legalizimeve po i afrohet fundi. Shtetëzimet (shpronësimet) e
viteve të fundit, për ndërtimin e veprave publike, po prodhojnë humbësit e parë
privat të pronës së tyre, qoftë ajo ndërtesë apo tokë. Por gjithashtu, po
kthejnë edhe skemën e strehimit social, në një skemë të re Ponzi. Nëse dështuam
me legalizimet, dhe falimenti i tyre megjithë dëmet ekonomike që e shoqërojnë
është i pashmangshëm, jemi akoma në kohë të mos l;ejojmë një skemë të re Ponzi
me strehimin social.
Comments
Post a Comment