Oligarkët, sipërmarrësit, partitë dhe ideologjitë! Liberale, 05. 10. 2020
Fjala ‘oligark’ i ka dhënë ngjyrat debatit politik të ditëve të fundit ndërsa është keqpërdorur masivisht dhe gjerësisht nga një spektër i gjerë njerëzisht. Pjesa dërmuese e përdoruesve të saj as nuk e dijnë kuptimin, thjeshtë e përdorin për të cilësuar ‘njerëzit e ligj’ që sipas tyre janë arsyeja e vetme pse vendi po shkon përditë e më keq. E dëgjojnë të përdorur nga ‘njerëz më të ditur’, dhe e përdorin pa e vrarë mendjen për semantikën e saj. Kurse pjesa ‘më e ditur’, që gjithashtu e përdor këtë fjalë, ndahet në dy grupe: një pakicë që ja di kuptimin por nuk ju intereson ta përdorin në semantikën e saj; dhe një shumicë që njohin kuptimin e gabuar të kësaj fjale.
Majtistët janë mjeshtëra për të ndryshuar
kuptimin e fjalëve, në interes të synimit propogandistik të diskursit të tyre.
Diku përdorin eufemizma ëmbëlsues, diku i shtojnë konceptit një cilësor që ja
ndryshon plotësisht kuptimin. Dhe diku tjetër, si në rastin e konceptit
‘oligark’, ja shtrembërojnë kuptimin duke e vendosur atë fjalë në një konteks
komunikativ të gabuar. Kështu, pas dikotomisë ‘komunist - antikomunist’ dhe ‘të
korruptuar - të pakurruptuar’, që kanë bërë dallimin “politik” në 25 vitet e
para të tranzicionit; koncepti ‘oligark’, me kuptim të deformuar duket se do të
ndërtojë dikotominë e tij, dhe do të udhëheqi “luftën” politike në muajt dhe
vitet në vijim.
Ndërsa kemi vite që e dëgjojmë të përdorur nga
opinionistë dhe pas tyre edhe nga masa e gjerë, muajt e fundit fjalën ‘oligark’
po e dëgjojmë të artikuluar edhe nga elita drejtuese e PDs. Ajo premton se sapo
të vij në pushtet do ti luftoj ‘oligarkët’, të cilët kanë përfituar nga PPP-të
e korruptuara të qeverisë. Kjo deklaratë politike e kthen fjalën ‘oligark’ nga
një fjalë popullore që përdoret gjerësisht nga masa, në një fjalë me thelb të
fortë politik që përdoret nga opozita. Dhe këtu vijmë te thelbi i gjësë, sepse
ditët e fundit e përdori edhe kryeministri, duke e betonuar si fjalën që në
vazhdim do të bëjë dallimin “politik” mes dy partive kryesore të vendit.
Pa as më të voglin dyshim, koncepti ‘oligark’
është politik. Futja e tij në diskursin e partive shqiptare, bile, edhe krijimi
i gjysmës tjetër të ndryshme të saj për të formuar një dikotomi ‘që sqaron
gjithçka’ në politikën e sotme; nuk është një gjë e keqe në vetvete. Atherë ‘kush
është problemi këtu?’ - do të pyeste një opozitare e re, dhe në pamje të parë
do të kishte të drejtë. Nëse është një koncept politik dhe po përdoret nga
politika, atherë nuk ka asnjë problem. Mirëpo, kthehet në një problem, dhe të
madh bile, kur konceptit i ndryshohet kuptimi. Sepse, nëse PD-ë nuk po na e qartëson
kuptim në të cilin e përdor, qeveria po e vendos atë në kuptimin e gabuar!
Janë dy statuse në të cilat z. Rama barazon
konceptin ‘oligark’ me konceptin ‘sipërmarrës i madh’. Sipas këtyre statuseve,
10 bisneset më të mëdha në vend kanë paguar 200% më shumë taksa, kurse 100
bisneset më të mëdha në vend kanë paguar 458% më shumë, se në qeverisjen e
mëparshme. Me një fjalë, sipërmarësit e mëdhenj jo vetëm nuk qënkan
privilegjuar nga kjo qeverisje por, edhe qënkan rënduar fiskalisht më shumë në
këto vite. Dhe këtë e thotë me mburrje. Medemek qytetarët duhet të kënaqen që
kanë paguar më shtrenjtë produktet dhe shërbimet që kanë marrë nga këto
sipërmarrje, ndërsa paratë e taksave shkojnë për PPP-të!
Sidoqoftë, nuk është ky problemi më i madh i
këtij kurthi gjuhësor dhe logjik, por mbi të gjitha politik dhe ideologjik.
Sepse koncepti ‘oligark’ nuk përputhet me konceptin ‘sipërmarrës i madh’, përveç
se në filozofinë marksiste, ku ‘të pasurit’ e përdorin shtetin për të
shfrytëzuar ‘të varfërit’! Në çdo fjalor të botës, që i ka shpëtuar kësaj
ideologjie, koncepti ‘oligark’ rrjedh nga ‘oligarki’, i cili emërton atë regjim
politik ku pushteti politik dhe ekonomik qëndron vetëm në duart e pak njerëzve.
Ai mund të jetë ‘socializëm stalinist’, sikurse e kemi përjetuar për 46 vjet ku
‘Byroja politike’ e Partisë-Shtet kontrollonte gjithçka politike dhe ekonomike
të vendit.
Por, tashmë që “komunizmi ra”, mund të jetë
edhe ‘socializëm demokratik’ - ku një grusht njerëzish në sferën politike,
ekonomike apo në të dyja sëbashku- përdorin pushtetin politik për të
kontrolluar ekonominë, dhe me paratë e ekonomisë së kontrolluar mbajnë
pushtetin politik! Në çdo rast, oligarkia ka gjithmon lidhje me socializmin,
sepse vetëm në regjimet kolektiviste shteti është aq i madh dhe qytetari aq i
vogël, sa oligarkia të funksionoj. Ajo nuk mund të funksionojë në demokracitë
liberale, ku shteti e ka shumë të kufizuar fushëveprimtarinë e tij. Nëse nuk ka
pushtet pakufinj për të shpërndarë para’ publike, askush nuk është i interesuar
të blej zgjedhje.
Kurse ‘oligark’, pavarësisht nëse roli i tij
është në ekonomi apo në parti, është çdo individ i ‘Byrosë’ së sotme, çdo
individ që ka fuqi vendimarrëse brenda oligarkisë. Pavarësisht nëse ishte i
pasur apo i varfër përpara se të “suksesonte” në politikë apo ekonomi, në këto
kohë kur gjithë të tjetër po falimentojnë. Që z. Rama nuk e kupton kështu
oligarkun dhe oligarkinë, jemi të qartë edhe pa na i thënë ai; ajo që na mbetet
është të presim PDn të na sqaroj si e sheh ajo. Nëse edhe ajo e percepton si
një luftë ndaj oligarkëve dhe jo oligarkisë, apo akoma më keq me oligark
nënkupton sipërmarrësit e mëdhenj; vështirë të ndryshoj ndonjë gjë e madhe në
këto trojet tona.
This comment has been removed by a blog administrator.
ReplyDelete